趣趣地:紅軍新衫似足Polo恤

趣趣地:紅軍新衫似足Polo恤

利物浦啱啱周四公佈2018/19球季主場新波衫,除咗繼續係傳統紅色兼玩復古,贊助商亦維持係「新平衡」,今次件衫仲有番領,好似Polo恤咁,而領上面同附近位置仲有啲白色條紋,概念嚟自晏菲路主看台重建後嘅建築設計。紅軍仲搞搞新意思,專設一款體現紅軍精神嘅新字體比球迷印字,有別於英超賽會本身要求嗰種字體,而且由即日起喺官網預訂,印埋球員名加號碼只係需要10鎊(約112港元)。另外,紅軍為紀念建會125周年,仲會捐出125件新波衫畀參與社區計劃嘅學生。