熱刺禮拜二晚喺英超獨腳戲，雖然作客俾白禮頓逼和1:1，但球隊射手哈利卡尼終於光明正大取得入波，賽後唔使同英超賽會上訴，亦肯定拎到第26個英超士哥，𠵱家同神射手榜首、利物浦嘅穆罕默德沙拿爭四球咋，想要完成英超金靴三連霸嘅創舉，要繼續加油喇卡尼！
話說早前卡尼係熱刺2:1擊敗史篤城嘅賽後，用自己嘅女兒起誓，信誓旦旦堅持球隊嘅第二個入波屬於自己，鬧得滿城風雨；不過禮拜二場波，卡尼總算向球迷展示自己嘅射手本色，唔係個個入波都要「呃呃騙騙」，下半場五分鐘熱刺孫興民喺右路壓落底線，引得白禮頓門將馬菲賴恩出迎，隨即將個波回傳中路，無人看管嘅哈利卡尼第一時間抽射破網，不過落後嘅主隊只係用咗兩分鐘就博到12碼，由中場柏斯高哥斯射入扳平，最終各得一分完場。
