一年前嘅今日，蘇富比藝術空間做咗一個同作家董橋有關嘅展覽「讀書人家－－董橋書房剪影」，啱啱好一年，今次就喺同樣嘅展場，做咗個「董橋和他喜歡的作家」嘅展覽，仲有得現場買埋董橋嘅新書《我的筆記》，買完仲有簽書會㖭。
展出余英時回信
八方現場所見，有書迷喺簽書會開始之前就已經排好晒隊。今次有賣只得10本嘅「特製真皮盒裝簽名鈐印本」，一本賣$1,800，一早已經俾人買晒啦。另外一般版本就每人限買5本，現場所見，每個人都差唔多買咗5本，仲有老竇帶埋個小學生囝囝嚟簽書會。
除咗買書，仲有個展覽，展出咗董橋喺《我的筆記》入面提過嘅藏書，包括《查令十字路八十四號》、《格列佛遊記》、《乞丐歌劇》等，全部都係私家珍藏。除此之外，個展覽仲有佢本新書嘅原始手稿，同埋知名歷史學者余英時獲寄贈新書之後寫畀董橋嘅信。不過董橋迷想睇都冇辦法啦，因為個展覽淨係得一日咋。
李八方