陳瀅和劉佩玥昨日到銅鑼灣出席美容品牌活動,兩人均遲大到,劉佩玥為好友解釋:「唔好意思,係好姊妹發生少少問題,條裙拉鏈甩咗補救唔到,要經理人再買條裙,真係唔好意思。」
陳瀅現身時多次向大眾道歉:「我喺尖沙嘴揸車過嚟,過海後遇上小意外,於是泊低架車行過嚟,其間條裙爆咗,諗住換過條裙先見大家,令大家等我咁耐非常之內疚,唔好意思。」最終陳瀅仍以爆裙亮相,她說:「條裙除唔到卡住咗,仲未諗到點處理,可能要剪爛佢。」大家提議她下次出活動要帶後備裙,陳瀅最初仍笑說:「諗過當大露背裝着,除晒入面啲嘢(指真空),𠵱家又尷尬又內疚又對唔住。」此時陳瀅越說越覺得尷尬,隨即落淚,劉佩玥見狀即上前呵番好友。陳瀅活動後與劉佩玥分別離開,披着外套的陳瀅更穿過後巷到皇室堡上車,乘坐私家跑車返電視城開工。
採訪:卓寶花
攝影:陳慧安