兩星期來凌晨起床睇歐聯八強半準決賽，足球迷為之眉飛色舞，如果你係任何一隊嘅粉絲，可能緊張到血壓急速上升。打完兩個回合，四強誕生，就係英超利物浦、德甲拜仁慕尼黑、西甲皇馬、意甲羅馬，與預期有啲出入，如利物浦領隊高普話齋：「今屆歐聯決賽隊伍，正常嚟睇，應該係曼城與巴塞！」
就係賽果不正常，球迷先至睇到咁刺激，全世界嘅足球博彩公司，包括香港馬會在內，呢勻一定係賺到笑，因為賽果爆冷，如巴塞作客輸畀羅馬零比三，試問邊度會有投注者買得中波膽？巴塞首回合在主場大勝四比一，到羅馬作客諗住出線絕無問題，點知陰溝翻船輸波，羅馬以一個作客入球取勝，得以打入四強；曼城又係第一回合作客輸零比三畀利物浦，次回合又再輸埋一比二，含恨出局。
於是有老友討論，巴塞模式過去幾乎所向無敵，但巴塞今屆與改良版曼城都一齊被淘汰，是否加迪奧拿嗰一套戰術已經行唔通呢？一挑起話題，幾位球迷老友爭辯不休。加迪奧拿在巴塞時所向無敵，去到英超第一季吃了車路士悶棍，今季則在英超聯賽率領曼城遙遙領先，聯賽未打完已奪得聯賽冠軍。巴塞也在西甲穩奪聯賽冠軍錦標，何解同出一源嘅巴塞與曼城在歐聯同樣受淘汰？
左丁山向球迷老友提出，巴塞與曼城都奉行控球在腳嘅哲學，以短傳滲入對方禁區射門取勝，用呢套戰術，就要起用腳法好、速度快、動作敏捷嘅技術型球員，不崇尚大隻佬柱躉式中鋒以及攔截兇猛、橫衝直撞之後防球員，曼城主力大衛施華、迪布尼、史端寧、桑尼、阿古路都係呢類型，巴塞有美斯唔在講，綠葉球員如恩尼斯達、蘇亞雷斯亦是同一模式。因佢哋技術超群，打聯賽係長途賽，水準夠穩定，贏波機會很大。但到咗歐聯八強階段，對手對巴塞曼城之tiki-taka踢法一清二楚，例如利物浦就針對性咁踢出前場壓逼，以速度及體力死纏曼城策劃師施華與迪布尼，打穩守突擊，前鋒有沙拿呢位快速魔術腳入波，後防密集阻截地波橫傳（曼城冇高大中鋒，無人衝刺），咁就得逞，羅馬可能有樣學樣，首回合大敗之後，返到主場就仿效利物浦嗰一套，憑高大中鋒迪施高衝散巴塞後防，後防緊迫美斯，結果以三比零取勝。巴塞曼城風格未必走到盡頭，但打盃賽一至兩場分勝負嘅，利物浦足球風格加上人腳齊全就有機會取勝。