近日一名巴士男乘客因為不忿坐前排嘅青年「怒睥」佢個女，同對方口角時涉虛稱對方非禮佢老婆，好在青年獲正義叔執言避過被屈。唔少網民則聲討呢對夫妻，有人稱男方係「新移民二代」，佢老婆係湖北人。
網民Kwong Wai喺fb發帖，話對夫婦嘅女用物件敲打前面張凳，發出噪音，坐前面嘅青年望佢一眼，兩公婆就鬧青年兇佢個女，躁夫仲撩個青年打交；躁夫仲用腳攔住唔畀青年落車，老屈對方非禮佢老婆，好在有位正義叔挺身指摘躁夫疑老屈，躁夫見勢色不對想走，輪到青年叫車長唔好開車門並報警。網民指警方到場後，躁夫改稱青年「想」非禮佢老婆，最終青年未被帶返警署。
警方回覆查詢證實14日傍晚，開往馬鞍山耀安邨嘅81C線九巴有人嘈交並報警，警方到場了解，雙方自行離開，案件列為糾紛。而被聲討嘅「新移民二代」，其友人就代其向本報伸冤，稱當時佢只想保護妻女，警告對方唔好觸碰到佢老婆，防止對方有進一步行動喎。
識睇睇留言
Karrie Wong：唔係個個都敢出聲，正義阿叔好嘢！
John Chan：誣告亦是刑事罪，為何放走誣告者？
資料來源：《蘋果》網站