近年串流音樂越來越普及，甚至已成了不少港人的必須品，除因為方便，隨時上網幾新幾舊的歌都輕鬆找到外，價格相宜相信亦是一大因素。大概只需一隻CD左右的月費，就可無限聽幾千萬首歌，絕對吸引。
近日，KKBOX推出全新家庭plan，$79月費可以3人共享KKBOX，計落幾抵玩。其實香港都有唔少音樂串流平台，好像Apple Music、Spotify等都有提供家庭plan，但收費有所不同，Apple Music和Spotify同樣收$88一個月，可供6人使用。或者你會話除開的話，Apple Music和Spotify人均收費比較抵，但其實諗深一層，香港6人家庭其實唔多，6人都會聽歌嘅就更少喇，所以6人plan隨時得物無所用，如果你只有3人share，KKBOX其實更化算。
另外還要考慮的是歌曲數量和種類，跟據官方數字，KKBOX有超過4000萬首歌，比Apple Music的4500萬首少，但就比Spotify的3000萬首多。比較重要的是KKBOX的華語歌量有絕大優勢，港、台歌曲特別多，另外亦不乏日、韓歌曲，相信會比較適合不同家庭成員。相反Apple Music和Spotify就相對注重外國和歐美歌曲，未必啱所有家庭成員。最吸引筆者的，其實還有KKBOX的歌單，有心思亦緊貼時間，好似有頒獎禮或演唱會，就會有相關歌單，俾你簡單聽晒得獎歌曲，相當貼心。
雖說是家庭plan，但跟Apple Music和Spotify相同，KKBOX的家庭plan，三人都會擁有獨立帳戶，有個人歌單，簡單點說其實就是一個價買3個帳戶，不過最後都要戴番頭盔，邊個抵用絕對是見仁見智，如果你有6人share又較鍾意外國歌，Apple Music和Spotify當然也是好選擇。
記者、攝影：韓繼聰
全新旅遊專頁，即like籽想旅行： https://fb.com/travel.appleseed