特首林鄭月娥突然宣佈新學年起恢復發放津貼，喺中小學推廣閱讀，涉及經常性開支4,800萬元，教育界立法會議員葉建源當然歡迎，仲重提兩年前時任教育局局長吳克儉削去有關資助，話林鄭係摑咗吳克儉一巴。但據康文署回覆立法會文件可見，葉建源可能錯怪吳克儉，皆因去年公共圖書館首10本借閱量最多嘅成人中文非小說類書籍，9本都係旅遊天書，可能都係吳克儉在任局長時身體力行推廣「外遊」引起嘅閱讀風喎！
如果要數呢十大，「吳得掂」真係贏晒，點解？10大中8位都係關於吳得掂最愛嘅日本，排首位嘅係《東京食玩買終極天書》，其餘大阪、北海道同沖繩等都有份。台灣以《台北＋近郊 高鐵遊：食玩買終極天書》佔第8位，爭一啖氣，唔畀日本威晒。而排第二嘅係《香港中學文憑考試。中國語文》，係唯一一本非旅遊書，但其實算係可喜，抑或可悲？
小說類10大 金庸佔8位
成人中文小說類書籍10大中，頭8位都由金庸經典，排首位係《射鵰英雄傳》，第9同10位則屬亦舒著作，分別為《某家的女兒》同《衷心笑》。
而查實2017年香港公共圖書館嘅中、英文書籍總借閱次數分別為3,740萬次同1,090萬次，當中本地出版嘅中、英文書籍分別佔1,810萬次同80萬次。
李八方