自由黨噚晚舉行25周年黨慶，現任特首林鄭月娥一改過去梁振英杯葛該黨黨慶做法，同三司及多名局長畀面到場，其間自由黨黨魁鍾國斌一度預告689會以政協副主席身份到場，點知酒會開始後就傳出689甩底消息，至酒會結束仍未見影，一向狙擊689不遺餘力嘅自由黨榮譽主席田北俊就寸爆CY，可能因為「天下為公」眾籌反應太理想而唔嚟。
田少最初得聞CY會到場，重提當年佢帶頭杯葛自由黨，繼而又話對於對方唔再做特首好高興，「我都唔係幾知佢呢個政協副主席做乜，可能出席吓我哋呢啲酒會都唔錯啊！」亦指林鄭做特首後，社會和諧好多，搞笑話唔會要林鄭捐款畀該黨，「自由黨係富貴黨吖嘛，點會叫行政長官捐錢畀我哋呢？」
娥特同司局長到場「大和解」
最終689甩底，田少有獨特見解，向同場嘅民主黨林卓廷話對方突然改變主意，可能因得知「天下為公」籌款初步達標，阿廷乘勢叫田少捐錢支持，田少即刻喺銀包攞出一張金牛，仲話相信計劃200萬都唔夠使，叫阿廷努力搵多啲有錢佬支持，要阿廷努力「還CY一個公道」。
黨魁鍾國斌致辭時話特首同司局長都出席，證明該黨同特區政府關係非常好；黨慶主持楊哲安則叫在場賓客影相後，放上網hashtag「大合照」就得，唔使用「大和解」，令台上嘅娥特都笑埋一份。
李八方
