前星期本欄寫咗幾日關於泰國豪宅及旅行之事。肥佬黎及後傳來短訊：「你或者可以參考經濟學人呢篇報導。」有乜好睇呢？於是叫肥仔K將幾份舊Economist送過嚟睇吓，在4月7至13號嗰一期第66頁，搵到肥佬黎所講嘅文章A new shade: The next Japan is not China but Thailand，內容係講泰國銀行（央行）作風保守，面對低通脹、人口老化環境，不肯削減利率，自2015年4月以來，利率還是維持不變（1.5%，3月28日議息後決定維持不變），似乎已不合時宜。文章作者嘅意思大概係泰國人口老化得快，到2022年有14%人口超過65歲，老化速度比中國還要快，而通脹率低得可以，三年來核心通脹低於1%，與日本情況相似。泰國是下一個日本，原來不是讚賞，而是貶詞，（即老化、有通縮威脅之社會），含義就係未來經濟發展缺乏動力！此外，泰國嘅移民政策也與日本差不多，只歡迎遊客，不歡迎東協國家越南、緬甸移民偷渡客。事實上，本欄講過，泰國失業率低得驚人，係1.3%，直情係全民就業，好應該輸入勞工，但偏偏泰國毫無通脹跡象，工人薪資增長不見得特別高，此則與一般經濟常識相反，令人大惑不解。2018年泰國GDP增長預測係達到4.1%。超低通脹，超低失業而GDP有4.1%增長，簡直係經濟學之夢幻世界。
咁講法，泰幣baht（銖）咪應該一路升值？又唔係噃，泰銖兌美元好穩定，間中跌少少，如果泰國係一個大國，一定會畀美國指責為貨幣操控國，好彩泰國經濟體積細，美國不以為意，唔得閒理佢。
泰國最大銀行一向係盤谷銀行，但近十年來其他銀行增長更快，據泰國賓架對左丁山講：盤谷（陳弼臣家族係大股東，陳智思係孫兒）排名已落在暹羅商業銀行及K Bank （Kasikorn Bank，舊名係泰華農民銀行，由伍家擁有）之後，據K Bank之最新預測，四月份係遊客高潮（潑水節）及上市公司派息季節，今年會向外國股東派息28億美元，絕大部份以外滙形式流出泰國，遊客數目亦在潑水節後開始減少，故此K Bank預期泰銖會受到短期壓力，短期內兌美元會貶值。如果預測正確嘅話，香港遊客五月去泰國放假，在滙水方面可能有着數。