落大雨時變落湯狗，真係我見猶憐！前日有隻流浪唐狗女喺落雨時走入荃灣一幢商廈，斷估係想避雨，佢沿車道慢行，全程好乖冇吠，但就快行到大堂位置未入門口，就被西裝保安哥哥截停，仲手指指向大廈範圍外面，做咗幾次，似乎係想叫狗女出去，之後就擰轉面走人。狗就呆滯企喺度，但保安哥哥都冇返轉頭強行驅逐。
呢幕保安趕狗俾一位網民拍低兼擺上網廣傳，片主形容擺上網係因為「睇唔過眼」，幫口嘅網民就話「條尾都夾到實……好慘好淒涼」、「點解避雨都唔畀喎」、指摘保安冷血無情；但另有網民圍攻片主，指保安都係打份工箒，手指指又做咗嘢咪雙贏囉！
工黨昨抗議管理過度
片段瘋傳後，工黨噚日朝早去到事發地點荃灣嘉達環球中心對出空地抗議，指事件令社會關注私人物業過度管理問題，要求對方制訂動物友善政策。仲量聯行物業管理公司發言人回覆，因狗隻喺車路徘徊曾險釀意外，故需盡快引導狗隻離開，明白公眾關注，已即時檢討，冀以更佳方法處理，達致情理兼備。
識睇睇留言
Cheung Shan Shan：查實有車喺度，驚隻狗狗會俾車撞到都係好正常嘅事箒！！
Daniel Wong：鏡頭下咁多人行行企企都冇幫……反而插個有公職在身嘅保安？
Dee Wong：雨後牠會走，不會久留，何必趕盡殺絕，一刻畀避雨也不可，太不近人情。
Hu Li：保安都冇做錯，如嚇親或者咬親人，又點算呢？又俾你哋話他失職啦！
資料來源：《蘋果》網站