女仔一般較早熟，所以小學階段唔少女仔都高高大大企最後排。身為政務司司長政治助理嘅蕭嘉怡（Kathy）都好有感受，皆因佢小六時已高約160cm，係籃球隊中鋒兼籃板王。之後繼續發育，咁大個咗又幾高？「都係160cm，因為小六後冇高過……」怪唔得有小學男同學得得戚同佢講，「以前望你要岳高頭、𠵱家就要耷低頭囉」！
陀住BB讀碩士
身為獨女，Kathy當然係父母掌上明珠，本身係裁縫嘅爸爸成日做靚衫畀佢，媽媽就飾演嚴母角色，「要我一放學就即刻返屋企，遲少少都要報告，我都好少出夜街」。雖然少，都有嘅，尤其少女情懷總是詩，有時會約啲姊妹食飯傾偈講心事，「有時遲咗啲，阿媽就會不斷打嚟，警告再唔返屋企就鎖門㗎嘞！」
小時候梳冬菇頭，小學參加交通安全隊時喺全港步操比賽攞過獎；羅定邦中學讀書期間參與嘅課外活動唔多，打籃球打到中二，礙於高度問題冇再繼續。佢話中學時開始諗大個咗想做記者，覺得可以搵到事實真相兼幫到人，中學畢業後到珠海學院讀新聞傳播系，其後想搵啲工同社區有關，最終喺民建聯做社區主任，2007年起開始參選區議會。
之後佢有再進修，理大社會政策及社會發展碩士畢業，當時陀住個女讀書，2017年畢業禮囡囡都有出席，別有一番滋味在心頭。今年35歲嘅佢每年都同父母旅行，「因為細個時爸爸好忙，冇一家人去旅行，希望我可以帶佢哋去」。
