恒生乒乓球學院尋日舉行2017畢業禮，話說恒生（011）經已同乒總合作27年，乒乓波可以話係恒生嘅文化之一。作為恒生「一姐」嘅鄭慧敏（Louisa）梗係要入鄉隨俗，落場打翻兩板。
Louisa上場未夠一年，但早於5個月前已經開始備戰，搵乒總名師陳淑媛上雞精班。尋日Louisa落場對打果然有姿勢有實際，就算對住世界排名第7嘅黃鎮廷都磋到幾板，一啲都唔似初學。
陳淑媛教練都要大讚呢位徒弟，話Louisa每次上堂都有進步，原來佢就算唔得閒拎起塊板連波，都會係屋企練下徒手動作，唔怪得姿勢咁正宗。
Louisa就話，自己本身打開網球，原本諗住可以用翻網球技巧，點知乒乓波完全係兩回事！所以每星期都至少抽1個鐘至個半鐘上堂，依家反應快咗，身手又靈活咗，之後都會keep住打。佢仲話，今次特登落場，係想畀一班小球手做榜樣，凡事有心唔怕遲，要畀心機練波咁話。