有時俾老細鬧兩句氣在心頭，又或負責嘅project處處碰壁好洩氣，最好搵個地方冷靜吓，喺添馬政總嘅打工仔，又有新嘅放空休憩處！
為配合港鐵沙田至中環線嘅興建工程而須原址重置嘅金鐘夏慤花園，噚日重開，花園佔地約1.35萬平方米，以平台花園設計，無縫接駁周圍嘅行人天橋，貫通商廈，極方便鄰近打工仔落嚟放鬆唞吓氣。
重置後嘅夏慤花園，點只花圃園景咁簡單？園內特設綠化階梯座位，等市民喺翠綠草坪同植物叢中放鬆，而重置工程期間發現、被鑑定為19世紀殘存海堤遺蹟嘅29件花崗石（圖），則已融入咗園景設計內，展示予公眾，花園中央仲增建鐘樓同擺放得獎嘅藝術裝置，仲有洗手間兼育嬰室㖭！