金管局素來講香港不見有資金流出，銀行結餘夠多，銀行頭寸充裕。但要來的始終要來，在4月12日、13日及14日，金管局為咗支持聯繫滙率機制，率先在港元兌美元跌破7.85之後，立即入市買港元，沽美金，維持強方承諾。雖然我哋唔知道確實資產流出數字，但沽出數量足以推低港元至7.85水平，數目都應該唔少，金管局自2015年以來第一次入市干預，連續四次入市，動用96.64億港元，可能只係初試啼聲，沽美金買港元嘅操作，陸續有來。
何解資金呢個時候會流出？論股市，美國股市自二月不時大幅度波動，一日升、一日跌，好多時視乎特朗普心情而定，今日出Twitter叫俄羅斯準備，美國飛彈來了（當然係射向敍利亞，斷不會射去俄羅斯），跟住第二日又出Twitter話未講過要攻擊，然後在美國時間4月13日晚上9時聯同英法空軍出擊，真係畀佢玩死，美國有如此總統，市場邊會有穩定性？唔講軍事行動，講吓國際貿易，2016年特朗普競選時，不斷痛罵奧巴馬推動TPP，違反美國利益，2017年佢一上台，立即宣佈TPP無效，美國退出。好嘞，雖有日本與澳洲大力積極補救之下，其他十一個亞太國家卒之談判成功，簽訂TPP新版本，叫做CPTPP（Comprehensive and Progressive Agreement for Trans-Pacific Partnership）。點知道在4月12日，特朗普突然間下令白宮經濟顧問庫德洛及貿易代表萊特海澤重新研究加入TPP，令市場為之愕然。
投資基金懼怕市場充滿不穩定性，美國股市大上大落，會驅使一部份基金增持現金，在可能獲利地區（例如香港）首先獲利回套，沽貨所得兌換至美元，班師回朝，故此資金流出香港。第二個可能性係基金預期特朗普還有招數在後頭，一打朝鮮，二攻中國，前者和談（大概在六月，特、金會面），若談判不歡而散，美國會有新制裁朝鮮措施（彭博4月13日報導，美國曾考慮將中國建設銀行及農業銀行列入援朝黑名單），後者就是特朗普嘅捧習招數不成功，就會反面，嚴格控制中國科技產品輸往美國。局勢如此難料，外資基金在此時刻為安全起見，在港走資不足大驚小怪，金管局預警香港加息，目前還是狼來了，4月12、13、14日之後，狼可能真的來了，港元加息機會大增，呢個時候去買房屋或轉按唔該計清楚自己嘅承受風險能力，最緊要睇被炒指數高唔高，自己份工穩唔穩陣呀？