人嘅運數好微妙，貝湯美同大摩解約後，剛周三（11日）谷草騎「光芒再現」留放一絕，但影相輸畀「育馬妙星」屈居亞軍，呢排真係當黑。相反，沈拿於夜賽憑「好友益」取得個人第10場頭馬，兼成功續牌騎到煞科，不但如此，呢位旺人還繼續有其他好消息。
今個月29號沈拿將首次參加女皇盃，策黑馬之一嘅「大雄圖」，「大雄圖」上場捧走跑馬地銀瓶，沈拿不慌不忙，將隻馬留到最後，直路喺內欄一衝而上捧盃，走位智慧有目共睹，繼續獲得大馬主潘蘇通同練馬師告東尼賞識，大賽給予機會，除咗係對沈拿騎功嘅肯定，更有助佢日後喺香港馬圈發展。
記得沈拿來港初期經歷低潮，當時賀賢願意提供支持，家陣沈拿彈起，反而賀賢成績卻停滯不前，只得7場頭馬，距離16場達標要求有一大段距離。
沈拿冇忘記賀賢當日嘅幫忙，坦白指賀賢有提點佢，協助佢盡快適應香港馬圈嘅模式，心存感激。沈拿話回到未紅時，一眾練馬師對佢嘅騎功有懷疑之時，賀賢已對佢充滿信任，將「亮先生」帥權交畀佢，結果兩戰直路賽取得1冠1亞。
今日（15日）沈拿再策「亮先生」，角逐第七場三班1000米直路賽，抽到有利嘅14檔，沈拿話隻馬復課繼續進步，自己有信心為積弱嘅賀賢打破悶局，取得久違嘅頭馬。