現年42歲嘅韓國職業格鬥選手秋成勳，之前攜愛女「得意妹」秋小愛演出育兒節目《超人回來了》而為人熟悉，雖然兩父女早已退出節目，但秋成勳亦不時亮相其他綜藝節目。秋成勳近日喺節目《TALKMON》就提到，因自己格鬥選手嘅身份要Keep住減重、健身，更即時公開自己嘅減重經驗，稱試過「10小時15磅」，引起熱議。
秋成勳表示：「以我自己為例，我會喺比賽前兩個月開始魔鬼式減磅訓練，目標係減22磅。一開始只減7磅，直到比賽前一日就一次過減15磅，所以就瘋狂去焗桑拿，務求出汗以減少體內嘅水份。由晚上10點開始到12點，來來回回桑拿房，2小時內就減咗7.5磅，之後飲200CC水就直接瞓覺，至翌日早上6點再去過(桑拿房)，再次來來回回兩小時就會再減咗7.5磅。」完全係極端減磅行為，令主持人都驚呼係咪真係合理。
不過由於短時間內瘋狂減磅，亦造成身體負擔，秋成勳表示：「當時咁極端減咗15磅後，連行路都冇力、聲都出唔到。同時效果唔持久，減完翌日就立即肥返22磅。」同時解釋格鬥選手時肥時瘦嘅原因，公開格鬥選手不為人之辛苦嘅一面。