作為特區之首，林鄭真係好鬼忙，好似噚日都連走幾場活動，朝早就去到啟德郵輪碼頭，出席勞工及福利局為慶祝旗下兒童發展基金成立10周年，推出嘅「Dream Cruises 乘夢啟航」旗艦項目啟航儀式，呢個計劃邀請咗80幾位基金學員同佢哋屋企人一齊登上「世界夢號」，體驗郵輪旅遊去廣州，勞福局局長羅致光都有出席啟航禮。林鄭致辭時鼓勵學員擴闊視野，不斷探索，從而更有力地掌握人生，「在未來的日子裏繼續敢夢、敢想，實現自己的理想」。
參加計劃嘅學員年齡介乎10至19歲，學員同家人旅程中可以使用海上高空繩索、迷你高爾夫、攀岩同VR探索館等遊樂設施。大會亦安排參加嘅學員同星夢郵輪船長Jan Blomqvist對話，聽吓船長有咩航海心得。