有時，真係唔多明民主黨搞個天下為公眾籌，究竟想搞邊科？
UGL事件民主黨林卓廷亦一直咬住唔放，直到目前為止，ICAC亦冇話結案又冇話去馬，結果就變成無頭公案。問題係點解𠵱家要用眾籌方式來追查，究竟想達至甚麼政治目標？
這項名為「天下為公」的眾籌，希望籌得200萬元，用於追究梁振英收受UGL近5,000萬元的責任，包括聘請律師、會計師提供專業意見，協助刑事、民事方面追查。目前已超過八成款項，相信應該可以達標，梁振英先後發聲明及律師信，要求該黨停止對他指控，並保留追究誹謗的權利。
首先用眾籌方式，當然係希望群眾對調查行動有參與，但點解用於UGL事件及用689作鬥爭對象就值得商榷。因為UGL事件拖延至今，重點不在於有大量未曝光資料，需要花費大量金錢聘請專業人士調查，而在於權力機構涉嫌包庇。立法會冇辦法引用《權力及特權法》作聆訊調查，背後有大老細發功，建制派不敢越雷池半步。廉政公署冇行動，之前亦發生行動處揸fit人李寶蘭及接任人先後請辭事件。其實，只要行政會議回覆廉署前特首有冇正式作利益申報，廉署就可以結案，若冇申報便好大機會涉及公職人員行為失當，就如曾蔭權情況，一切只需依法辦事。至於有否觸犯《防賄條例》，按曾蔭權案主審法官當日引導陪審團所指的「黃金枷鎖」，即使特首冇作出有利對方行動，只要一旦收受不當利益，就等如觸犯《防賄條例》。其實，件事一字咁淺，to be or not to be ，有乜嘢需要用錢去查？重點是民意、社會對事件的政治壓力是否足夠大，去到一個程度令特首林鄭月娥硂律政司及廉政公署逼於公眾壓力，要揸正嚟做。最近被定罪的前南韓總統朴槿惠，係南韓人發動真正天下「圍攻」，「心腹干政」閨蜜崔順實行賄、走後門、干政等醜聞傳出，大批群眾上街示威掟雞蛋，年輕世代對於崔順實的干政極度反感。香港人有這種反應嗎？再者民主黨大狀眾多，會計專業泛民陣營也不少，議員追究前特首涉貪乃份內事，真係唔明點解要眾籌？
第二個疑惑是時機問題，究竟當前主要政治矛盾，係689定777先？即使成功打貪，對當前政局又有何改善作用呢？除非民主黨可以向公眾說明，689仍在做特區太上皇，垂簾聽政、指手劃腳，動員黨媒、建制派及紅色群眾組織，繼續興風作浪，繼DQ 6之後又再捧出戴耀廷「搞港獨」，拉高政治矛盾，撕裂香港社會！問題係習帝治下香港還可以有太上皇？王志民主任公開表示習近平特區事無大小都親自過問，試問邊個敢僭奪習近平權力？𠵱家先至去鬥689對於割地兩檢、繼續DQ、借反港獨打壓言論自由、23條立法、國歌法、重啟政改，一連串公眾關心的政治議題，究竟有乜幫助？有勞進一步說明，而至今我實在睇唔通。
民主黨宜多作解釋
除非係老鼠仔掘井！是一場「成功爭取」的遊戲，咁就去到中共權力內鬥層次，我屬門外漢冇發言權。但「天下為公」成件事，政治上總令人覺得怪怪地，唔似一貫民主黨作風。希望民主黨能夠多在政治論述方面下工夫，向公眾解釋現階段搞UGL政治上有何階段性目標，因為我理解的UGL已經屬政治事件，唔係法律事件。
添馬男