全港最大型學生科研比賽「香港青少年科技創新大賽」噚日舉行頒獎禮，主辦單位香港新一代文化協會，佢哋嘅總幹事兼江蘇省政協委員蘇祉祺話呀，今年唔少新發明都好有市場潛力，值得稱許，又話過往如「星之子」陳易希等都係藉此比賽晉身初創企業家，隨大灣區發展、深圳南山區嘅成熟，期望更多初創企業日後北望神州。
其中一個被蘇祉祺點名稱許嘅產品，係由聖公會李炳中學製作嘅「突破性機械式義肢」。呢個作品獲得數理及工程（初中組）嘅一等獎，呢款毋須用電嘅全機械式義手，採用三爪式設計，用推桿動作來產生同傳遞動力；而且能夠自由調節義手嘅活動幅度。製作呢隻義手嘅成本僅400港元，較動輒以萬元計嘅電動義手便宜得多。