話晒噚日都係中國訂嘅全民國家安全教育日，兼且中聯辦主任王志民同人大常委會法工委員副主任鄭淑娜等發言，難怪一個講述國家安全嘅論壇，座無虛席，全場人士坐定定接受「訓話」。
之不過咁，查實大家又諗唔諗到，國安同食物衞生有乜關係？可能在場人士都有啲疑惑，而且坐得耐都人有三急，結果論到食衞局局長陳肇始發言時，竟然變成廁所位，唔少人包括王志民、港區人大代表吳亮星、政協委員鄧竟成等，都選擇喺呢個時候去廁所噃！
咁到底陳肇始講咗乜？原來佢話，食物安全唔單只關乎食物衞生、質素同安全標準，亦關乎點樣確保獲得穩定、足夠、來源可靠以及有營養嘅食物供應，強調「食物安全影響每一個國家或經濟體的人民健康和生命安全」，所以要確保大眾舌尖上嘅安全。