𠵱家啲小朋友功課壓力大，放學又要補習又要上興趣班，真係少少玩樂時間都無。公民黨油尖旺區區議員余德寶就覺得，小朋友若果只係掛住讀書，真係冇晒童年，佢喺熱心街坊贊助下買咗部夾公仔機，等海富苑入面嘅小朋友去補習前，可以玩一陣夾公仔、夾糖仔，搵番個美好童年。
余德寶話，唔少區內家長都反映，嚟緊要復考小三TSA，擔心小朋友又要操練，好少時間可以玩。佢同街坊商量後都認同快樂童年好緊要，喺熱心街坊贊助下買咗部夾公仔機，仲放咗好多糖果喺入面，等小朋友經過可以玩吓唞吓氣。
試行咗一次，佢就話反應好好，好多小朋友排隊，嚟緊都會繼續搞。佢自爆中學時都成日同同學去夾公仔（唔知夾嚟送畀邊個呢……），所以今次順便畀個機會佢大展身手喎。