今季澳職常規賽，喺周日上演最後一場比賽，由前港足球隊傑志教練甘巴爾領軍嘅西悉尼流浪者主場迎戰阿德萊德聯，過程峯迴路轉，為爭入季後賽非勝不可嘅西悉，領先過然後被反超前，之後有12碼機會可以再次領先，結果都係把握唔到，最終以2:3不敵阿聯，提早放假。
唔同好多主流聯賽，澳職常規賽最後一輪比賽唔會安排喺同一時間上演，由於布里斯班獅吼喺早一日比賽贏波，壓過西悉升上第六，西悉喺周日迎戰阿聯，要入前六出戰季後賽形勢簡單，就係要贏波全取三分。佢哋亦有好開始，西班牙前鋒奧利奧爾尼亞拿喺16分鐘先開紀錄，但之後連失兩球，落後下有倒戈嘅卡路斯卡入波追平2:2。完半場前西悉獲12碼，但尼亞拿操刀唔入，錯過再領先機會。易邊之後西悉狂攻唔入，踢到80分鐘仲輸反擊，阿聯由賴恩基圖入波奠定3:2勝局。
淘汰圈賽事周五開打
西悉繼14/15球季再次無緣季後賽，而今季六個出線席位亦已經決出，周五就會開始進行淘汰圈賽事。