四月五日清明節，晨早往拜山之後，中午與家人去紅磡碼頭嘅新酒店Kerry Hotel吃自助餐。去呢間酒店，係新城電台啲朋友介紹嘅。原來識揸車去黃埔花園，過咗隻船，一個右轉直行就可以到嘉里酒店，如果行路去，或要十零分鐘，由紅磡火車站行過去，亦唔算係短路程。
一入嘉里酒店，見到好多外國彪形大漢雲集大堂，其中有一堆人穿綠黃色T恤，講英文常有mate跟尾就知道佢地係澳洲人，醒悟到係七人欖球賽時間，外國隊伍可能全部入住呢間酒店。上到咖啡室，有一條街咁長，可能係全港最大一間酒店咖啡室，在門口攞完日本魚生壽司，行番去咖啡室之最尾座位，就好似在大道中上海商業銀行總行，行去馬莎百貨公司咁樣，最後面一段位置可能係兒童區，細路與父母聚集於此，十分熱鬧。點解咁多細路嚟食自助餐呢？原來每枱有兩個細路（六歲以下）可以免費，算係大優惠也，再加埋用恒生滙豐白金咭找數有八五折，平均每人約四百元，今時今日，可能平通尖沙嘴紅磡，何況呢度還有無敵維港景（望北角）。
食嘢之際收到短訊：「Hi，我坐咗喺後面呀。」回頭一望，為之哈哈大笑，原來就是新亞新聞系師妹張敏華，佢遞上新咭片，佢已經在花旗銀行升職，由零售銀行調咗去私人銀行做環球投資亞太區投資策略師，佢以後嘅客戶就係啲高淨值人士啦！
次日星期五到陸羽，高朋滿座，有不少外國人客，我哋長枱都有兩位熟朋友從美國專程飛來睇七人欖球，二十幾年來熱情不減。餐廳R話今年七人欖球賽剛好與在澳洲黃金海岸舉行嘅英聯邦運動會撞期，英澳紐加南非等欖球強國主力球員，都會留力爭奪英聯邦運動會欖球金牌，預料視七人欖球錦標為國家最大榮譽嘅斐濟（Fiji）會以大熱門取勝。餐廳R呢位七人欖球常客又估得幾準，最後斐濟奪標四連冠，斐濟舉國狂歡！大家傾傾吓，陸羽三樓資深企堂（侍應）阿潤走埋嚟多謝餐廳R捧場。因乜事呀？餐廳R話，阿潤最近慶祝金婚，子女為父母在怡東酒店擺酒招待親友，餐廳R係唯一之外國賓客。阿潤自小十零歲已在陸羽揸茶煲，佢今年78歲，在陸羽工作六十餘年，養大四個仔女，全部大學畢業，成為專業人士，可算是另一個香港打工仔傳奇，36年前，左丁山大膽簽名，批准阿潤攞一張運通卡（無收入證明），你估係一時興起咩！