近年多咗好多傷殘人士用電動輪椅外出，當然對佢哋嚟講方便好多，但電動輪椅始終係輪椅，唔係電動車，如果駛上馬路同天橋，不但影響交通同危險，仲隨時發生意外，最近有網民上載一段短片，影到有人將電動輪椅當電動車駛上天橋，仲幾乎發生交通意外。
網民近日於「老實香港人」facebook上載一段27秒短片，片中輪椅漢駕駛其「電動車」在香港仔大道上天橋飛馳，嚇煞尾隨司機及乘客，拍片者慨嘆：「隧道口有𨋢搭㗎嘛！」
尾隨司機無奈慢駛
上載片段者亦留言話架電動輪椅係「Tesla 2018 new單人版，接受預訂」，不過當時情況就唔係講笑，因片段顯示電動輪椅行駛嘅路面較窄，尾隨嘅司機無奈全部要慢駛，以免撞到架電動輪椅，點知突然有一架電單車從左方爬頭，鐵騎士駛過先見到原來有部電動輪椅，好彩即時收到油先冇炒車，被爬頭嘅司機鬧電單車咁爬頭，隨時車死人嘛！不過亦有網民留言，話電動輪椅咁做害人害己，亦有人認為冇佢符，惟有慢車避免出意外。其實電動輪椅行馬路唔係第一次，之前已有大律師提醒電動輪椅使用者，電動輪椅雖不屬於任何汽車類別，毋須登記領牌及考取車牌，但唔代表可以喺公路行，如果證實涉案者危及行車安全，警方可根據《簡易程序治罪條例》起訴，罪成可被判處罰款5,000元或監禁3個月。