距離一年一度六四燭光悼念集會有個幾月，但多得新任人大常委譚耀宗公開話邊個講結束一黨專政，就係違憲、甚至冇得參選，令市民更關注今年六四燭光晚會。其實支聯會今年嘅六四悼念活動已經開始，而臨時六四紀念館亦會喺下周五開幕，而今年以改革開放40年與六四為主題，仲有六四解密檔案展出。
支聯會副主席麥海華話希望藉主題，帶出改革開放40年同六四事件之間關係，佢話改革開放固然改變中國，但同時亦引起好多經濟、社會文化、環保、甚至宗教等問題，呢啲問題亦同六四嘅出現有關，希望有助市民更深入認識六四前因後果。
今次紀念館亦有一個六四解密檔案展覽。麥話六四事件至今29年，近年海外唔少有關六四嘅檔案陸續解密，有助市民更了解六四真相，好似六四死難人數，中國官方話幾十人，但好多外國政府解密檔案就話以千人計，今次展出正好畀市民更完整咁了解六四真相。麥話出年係六四30周年，希望今年係最後一年搞臨時六四紀念館，出年可以有新嘅永久六四紀念館。