立法會現時仲有兩個議席懸空，原議員係九龍西嘅劉小麗同新界東嘅梁國雄。外間預料小麗即將撤銷就議席嘅司法覆核上訴申請，小麗噚日同傳媒茶敍時透露仲要同民主派討論，但承認訟費係重要考慮，加上法庭排期到明年4月，若然敗訴先補選，「唔知夠唔夠時間選」，所以多項因素下會考慮撤銷申請。
小麗喺3.11補選後一直未有公開露面，佢話過去一個月一直同公民社會討論補選安排，亦有檢討上次補選失敗經驗。佢話上次初選安排令姚松炎選舉工程滯後，「畀時間建制派做宣傳」，話主流聲音都話唔使搞初選，但佢唔係代表所有人下定論。小麗又相信唔少朋友都會尊重由佢物色Plan B人選，問及有乜條件，佢話要有圈中人力撐，亦希望能團結泛民同着重民生。