上月底八方報道有網民投訴韓式婚攝服務中伏，揀相時發現多張相片角度同構圖差，仲話影到老公似浮屍，並將部份相放上網公審。婚攝公司S.A. Wedding終於喺facebook專頁發聲明大反擊。
公司先澄清攝影師係有9年資歷嘅真韓國人金正煥（佢哋強調唔係金正恩），曾經喺韓國兩間攝影公司工作，又爆料話投訴人拍攝前一日先要求取消拍攝同退款，但婚攝公司表明合約定明不可更改或取消故拒絕，但可破例轉讓畀朋友，投訴人最後回覆：「我唔開心，你哋都唔會好過。」
寸對方翻拍相片失焦
對於投訴人上載一張以手機翻拍嘅相，話廣東道「路人大合照」焦點落喺路人而非新人，公司反擊指原圖無失焦，「在此提供一個冷知識，手機無法對焦，不等於當日拍攝用的相機沒有對焦」，又話當日已提醒客人周末廣東道人多，但對方堅持拍攝，寸爆話已經祈禱希望拍攝當天有奇蹟，路人全數唔會入鏡，但未練成逆天嘅能力。佢哋仲公開部份經後製嘅相，話要「為這個高壓的社會再添一點花生」，唔少網民認為相片效果唔錯。
李八方