舊年年尾有傳航空界「超級巨無霸」A380客機會停產，但今年終於打破傳聞，除咗阿聯酋航空有新定單，新加坡航空公司（新航）亦話佢哋引進咗5架全新嘅A380客機，同埋更新14架舊客機嘅客艙裝置。
全線A380變身
新嘅客艙配置有咩唔同？佢哋嘅公關經理初君柱就話，經濟艙嘅座椅用咗薄身嘅物料，坐喺後面嘅人隻腳可以放得舒服啲。佢哋連頸枕都重新設計過，除咗可以上下移動，仲有得左右屈曲，校到自己舒服為止，實行坐經濟艙都可以舒服過人。
新航𠵱家1星期有4班來回新加坡同香港嘅航班係用緊新機，等到5月就全線嘅A380都會變晒做全新嘅客艙裝置，而為咗慶祝佢哋係香港成立60年，嚟緊買飛去新加坡嘅機票仲有優惠㖭！