俗語話做記者要鐵腳、馬眼、神仙肚，估唔到今時今日竟然仲要面皮厚。事關最近唔少外國體育記者發起，拒絕再喺做直播嘅時候被強吻嘅運動，連香港呢邊都多咗人發聲，連前無綫記者黃大鈞都分享咗自己嘅經歷。
問主管會否一笑置之
前排有線女記者做直播被強吻受屈，平機會都出聲話咁樣其實係性騷擾。黃大鈞亦喺fb分享親身經歷，仲有圖為證，相中可見一位金髮女郎錫咗黃大鈞塊面一下，而黃大鈞當時呢……只能好尷尬咁笑吓囉。
相信冇乜人見過呢個畫面，因為據黃大鈞所講，呢個係「當年沒有出街的畫面」，佢仲加多句話「如果主管睇到會否一笑置之」，似乎話中有話咁噃！點都好啦，無論係男記者定女記者，當佢哋做緊直播或者做緊「扒」時，相信唔希望亦唔應該受到騷擾。