上星期某日晨早坐的士去中環，一上車就預備閉目養神，點知司機大哥回頭望幾望，然後開聲：「請問你係唔係左丁山呀？」哎吔，又不能不認，只好瞌埋眼答佢嘅問題及同佢講利物浦大勝曼城三比零，嗰場歐聯半準決賽第一回合。最後，唔抵得問佢：「你睇蘋果副刊鍾意邊個作家呀？」司機答：「好多個都鍾意，馮晞乜嘢話？（馮晞乾），好有學問；高慧然好過癮……」
4月7日高慧然就真係幾過癮，高小姐痛罵一啲加拿大華人係雙重背叛，入籍加拿大時唱加拿大國歌，宣誓效忠之後，又自認「愛國」（中華人民共和國）……高唱「起來起來」，直情係先背叛祖國，然後背叛入籍國，用香港特區釋法嘅標準，唔知加拿大可唔可以DQ呢類華人嘅加拿大國籍及收回最緊要嘅加拿大護照呢？
跟住又睇到4月7日之明報A8版，有一篇廣告篤口篤鼻，啱晒高慧然痛罵之言，賣廣告嗰位「旅加港人楊湛」與高小姐筆下之雙重背叛加拿大人，幾令人回味。
呢段廣告都幾長，收尾兩段云：
「香港法官拒絕受理區諾軒支持『港獨自決』、焚燒《基本法》，被市民質疑其參選立法會資格的司法覆核。區諾軒及一眾港獨分裂勢力更加有恃無恐宣揚港獨，說甚麼無論是主張『統一』或『獨立』，都應擁有並堅守言論自由。顯見是對國家統一、反分裂的至高法律原則的顛覆，難怪戴耀廷自認踩紅線敢言，又拉上言論自由辯護，難怪這一眾人士那麼懼怕保障國家安全的23條立法。
出得來混總是要還的，有人把香港搞得妖霧彌天，總有國家撥開妖霧的一日。當前的形勢已一再提醒中央和港府，務必警惕港獨勢力坐大，而和港獨鬥爭最強功力還是法制補漏。港獨做初一搞亂香港，中央必做十五根治妖霧。這一天還會遠麼！」
楊某人在加拿大得加國政府庇護，得享充份言論自由，高度福利，於是得閒印印腳咁花錢賣廣告痛罵戴耀廷及泛民主派。唔知魁北克法裔公開講魁北克獨立、搞獨立運動，而加拿大政府處之泰然，冇喊打喊殺之時，呢位楊某人有冇在多倫多明報賣廣告痛罵魁北克獨立派呢？左丁山從來認為港獨係偽命題，不值得討論嘥時間。但別人要講，我地憑乜嘢去阻止佢地嘅發言權利？
香港建制派有不少不講法治之人，例如譚耀宗猛咁叫香港大學炒咗戴耀廷，佢都唔問吓港大建制派教授陳弘毅，港大憑乜嘢去炒戴耀廷呀？港大校務委員會主席李國章畢竟做過中文大學校長，認識大學體制，雖然係建制派亦敢對記者講：「戴耀廷冇犯法，港大唔可以叫佢走。」（大意如此），以譚耀宗咁嘅知識水平，亂咁噏之前唔事先請教吓陳弘毅、李國章，真羞家，點做國家領導人級數嘅人大常委？李儲文係耶魯神學博士，生前做唔到人大常委，如果知道譚耀宗做咗，可能覺得好遺憾！