黑幫當街毆鬥睇戲就見得多，真人街霸你有冇遇過？近日網上熱傳一條疑似當街開拖影片，至少3男圍毆1男，即使有人嘗試拉開惡男，但惡男掙脫之後繼續踩向事主，其間有人大叫「打死人喇」。
警追緝3男
事發地點喺大埔，開拖片應該由對面住宅拍攝，幾名惡男將事主推倒地上，惡男右鈎拳、連環飛腳踹踏事主攻勢不斷，更一度捉住綠的車頭蓋借力猛踩。惡男女伴試圖「攬開」其中1名惡男失敗，整個過程維持至少半分鐘。樓主思疑事件係黑幫收陀地發生爭執再打人，但有網民相信係飲醉酒然後大打出手。警方證實4月2日上午8時接報大埔仁興街幾名男子同一名餐廳東主因瑣事爭執，幾名男子其間襲擊餐廳東主，警員拘捕一名28歲姓羅男疑犯，涉嫌襲擊致造成身體傷害，正追緝其餘3名涉案男子。
識睇睇留言
Fai Wingfai：仲衰過公安！
Kin Over：香港治安越來越……
Ben Lam：想食皇家飯。
Ck Wong：冇出色先做埋啲咁嘅嘢。
資料來源：《蘋果》網頁