噚日係立法會3.11補選一個月「紀念」，估唔到港島區兩位主要對手區諾軒同新民黨陳家珮（Judy）有機會喺立法會「重聚」。話說新民黨主席葉劉淑儀噚日帶埋Judy現身會議廳外嘅綠地毯，煞有介事同大家介紹，呢位就係佢嘅新助理喇。新民黨家陣得兩位立法會議員，葉劉話好多議題例如勞工、環保等，佢同容海恩都跟唔晒，決定搵Judy做助理幫手跟吓。
換個身份「晉身」立法會，Judy都笑意盈盈。佢話好似廢物回收呢啲環保議題都係佢好關注嘅事，加上身為人母，幼兒、安老、外傭呢啲更加係切身嘅事，所以打算以助理身份貢獻一下。至於有機會喺立法會見番區諾軒，Judy即刻笑笑口反問，區諾軒有冇着番靚仔啲？
而葉劉出手都唔算唔好高，Judy一個星期返立法會15個鐘，月薪1萬蚊，相信佢搵Judy做助理，重點都係畀個機會愛將熟習下議會工作，經驗緊要過人工咯。