民主黨發起「天下為公」眾籌查前特首梁振英UGL涉貪案，大嗱嗱200萬，喺今時今日社會運動氣氛低迷嘅時候，真係唔多令人樂觀。但呢個計劃公佈咗幾日，至噚晚11點就籌到超過100萬，已經達成目標一半。
有份搞呢個計劃嘅民主黨林卓廷指市民反應踴躍，甚至有街坊拎埋錢上佢議辦話捐錢，反映大家都好想追查事件真相，只不過佢哋眾籌係唔收現金，惟有婉拒好意，或者都再諗吓有乜網上外嘅其他方法接收捐款。
而阿廷噚日返立法會途中，都有市民同佢講起「天下為公」呢個計劃，叫佢哋畀心機、加油，可見市民反應幾好。
市民咁大反應，可能要多謝梁振英，君不見自從梁振英出聲明鬧阿廷、之後出埋律師信後，群情更洶湧，據聞連海外嘅港人都打畀阿廷話支持，所以呢，689真係「天下為公」嘅啦啦隊隊長呀。