「中國女股神」西京投資主席劉央噚日除咗力撐騰訊（700），仲好識do，大讚習大大係偉大嘅政治家，話美國總統「侵侵」比起嚟，完全係兩個層次。
話說講到中美貿易戰，劉央夠膽講話，呢場貿易戰只係「習大大」與侵侵喺世人面前玩遊戲，尤其侵侵成日用twitter發文，居然可以左右股市，簡直係有病。佢話侵侵係完美嘅生意人，好識做生意，但習大大係偉大嘅政治家，所以唔可以將兩個人放埋一齊講。劉央上述嘅說話係用英文講，她雖自稱英文唔太叻，但引到台下班「鬼佬」捧腹大笑，就知「女股神」個朵非浪得虛名。
獲劉央金口加持嘅，連港交所（388）李小加及特首林鄭月娥都有份，讚佢哋改革上市制度有功，引入同股不同權公司。不過，睇番劉央近幾年嘅往績，講親都……睇嚟小加可能要求求劉央今勻真係轉運喇！
李華華