周二除咗上演兩場歐聯八強大戰外，英冠亦都加咗開快車；眾所周知英國威廉王子係忠實阿士東維拉球迷，當晚佢就同埋前維拉挪威前鋒、掛靴踢過維拉嘅卡維一齊去撐愛隊。而維拉喺星級球迷打氣下亦相當爭氣，憑「英國周柏豪」基亞利殊完場前五分鐘入波，一球絕殺賽前排喺第二嘅卡迪夫城，維拉只要再贏多場，就肯定至少拎到升班附加賽資格囉！
查實維拉今場贏得一啲都唔輕鬆，卡城上半場先有文迪斯拿寧埋門中柱，加上維拉右閘艾莫哈馬迪護住空門，加上今場嘅最佳球員、從曼聯租借嘅年輕門將森莊士東高飛低撲，維拉先可以力保不失。眼見場波要打和之際，「壞孩子」基亞利殊襯卡城球員角球解圍不遠，喺禁區頂射入靚絕窩利；而喺看台上嘅威廉王子隨即振臂高呼，表現相當興奮。
「英國周柏豪」絕殺卡城
賽後英國《太陽報》更揭發，原來現年已經四歲嘅小王子佐治同兩歲嘅夏洛特公主，都受到老竇嘅薰陶成為咗維拉嘅球迷㖭！而維拉贏波之後，仲追到同今場對手、賽後跌落第三位嘅卡城四分，聯賽仲剩返四輪之下，維拉雖然比較難爬上頭兩名直接升班，但只要贏多場就肯定保住前六嘅升班附加賽資格，只要維拉繼續過關斬將，來季英超大家或者有機會見到威廉王子入場睇波呢！至於目前英冠第五至第11位嘅球隊，亦只喺得五分差距，英超席位咁吸引，邊幾隊可以踢入前六爭升班，相信要到最後一輪先知。
葉軍贏波留唔住領隊
不過排喺第12位嘅葉士域治，同日雖然喺主場同樣一球小勝班士利，但賽後仍落後排第六嘅米禾爾多達12分，升班唔使預佢地囉。而早前已經傳出季尾會離隊嘅領隊麥卡菲，賽後亦宣佈同球會提前分手。