廁所衞生狀況，竟然都登上議事堂。話說旅遊界立法會議員姚思榮噚日喺立法會特首質詢環節，提及旅遊景點公廁不足，衞生情況亦差，尤其偏遠地方嘅旅遊景點更甚，姚思榮向娥特提問：「有冇考慮喺香港進行一場公共廁所嘅革命？全面改善同提升香港公共廁所嘅設施同埋衞生嘅環境？」
姚思榮：中環街市廁所肉酸
佢仲好似廁所專家咁提到，「我覺得中環街市個廁所好肉酸，中環係個中心區，特首應該關注」，仲話應該喺啲地方設計「特別廁所」，令遊客有新感受。
一向大細問題都親自抓嘅林鄭，態度好正面，佢話遊客對一個地方嘅觀感，公廁扮演重要角色，又話知道內地推行緊公廁革命：「我哋都有決心改善呢個情況。」除咗要學習總，佢仲提及其中一個方向係改善公廁嘅工人安排：「我特別請咗食環署，亦有康文署下面嘅合約承辦商，請咗喺呢啲公共設施做清潔、做保安嘅朋友同我見面，等佢哋提出究竟有乜嘢方法，能保持公共廁所嘅清潔，我哋一定會跟進。」
至於中環街市嘅公廁改善工程，林鄭話正等待市建局活化中環街市，會盡力做好。
李八方