馬鞍山居民不時投訴西沙路飛車黨嘅引擎聲擾人清夢，該區日前再多一種噪音煩擾街坊。網民Maktsz Crapemyrtle周日喺「馬鞍山之友」facebook專頁上載短片，指凌晨時分有泊喺路邊嘅私家車防盜突然響起，幾乎響徹整個屋苑，「新港城4期，2：50響到3：00個車主終於出現揸走架車」，網民話如果喺舊區，架車勢必受到水彈、屎彈甚至玻璃樽「招呼」。
兩段短片各長約1分鐘，首段片顯示私家車停喺新港城4期附近、鞍祿街路邊，車頭燈不斷閃，響起防盜；另一段片相信係車主返回駛走座駕，但似乎一度想繼續違泊，喺同一條路較前位置停一停後再開車，絕塵而去。上載短片者話防盜聲響咗10分鐘，網民斥車主好自私，「前少少就係停車場都唔泊。佢知唔知嘈醒咗幾多人㗎？」有人更指出，遠至屋苑2期都聽到。
當晚咁啱係英超曼市打吡戰，曼聯作客反勝曼城，有網民聯想到車主可能係曼城球迷「黐Q咗」，有人笑言「曼城球迷應該受雙重打擊」。車主係咪哭波喪不得而知，但曼城球迷今次可謂躺着也中槍。
識睇睇留言
Gen Yamato：樓上咁多居民對正位都唔做嘢，咁仲有乜好嘈呢？！
Lianna Kissy：部車響防盜=車主自私？防盜夜晚有事唔畀響咁裝嚟做乜？半粒鐘處理咗都算快啦……
葉士：除非有人報警，否則警察都會隻眼開隻眼閉！
項梁籍：舊區會享受到水彈，屎彈，玻璃樽。
資料來源：馬鞍山之友專頁