如果每間球會都有一位標誌性人物，咁近十幾年嘅「床單兵團」馬德里體育會，你第一個數到嘅一定係費蘭度托利斯。呢位年少時已有馬體會金童之稱嘅前鋒，07年去英超闖蕩加盟利物浦後，喺2015年倦鳥知還，再投母會懷抱，但佢周一就宣佈，今季季尾約滿後唔會再續約，將會第二度離開母會。
雖然費托三年前回歸馬體會嗰陣，超過四萬名球迷喺球會總部外聚集，夾道歡迎佢回巢。返歸後嘅佢有時表現都唔錯，包括剛回巢2014/15嗰季，就喺西班牙盃16強次回合對皇家馬德里射入兩球，協助球隊最終淘汰死敵晉級，亦係佢踢馬德里打吡以來第一次喺巴拿比奴入波，但如果要總括外界對佢呢三年嘅評價，就只係見佢坐後備席多過踢波，今季迄今上陣過20場西甲，但有17場都係後備入替，只係入得兩球。
過檔美職聯機會高
隊內已經有基沙文呢位新揸弗人，而今年一月仲要連迪亞高哥斯達都返埋嚟，費托計吓數，連埋安祖哥利亞同加美路在內，自己上陣機會只會更少，咁不如去第二度搵食，好過留喺度坐冷板，而教練施蒙尼亦公開表示唔會挽留佢。
費托發出嘅聲明中，亦講明冇得上陣係佢選擇二度離隊嘅原因，希望去其他地方踢多三、五年先收山，但就冇透露未來去向。有媒體就認為佢加盟其他西甲球會或回流英超機會都唔大，反而可能效法前國家隊隊友韋拿咁過檔美職聯，至於中超，因為家陣對引入外援有諸多限制，都未必吸引到費托。不過，金童地位始終有番咁上下，馬體會已確認會喺今季最後一場聯賽主場對伊巴嗰陣，加插歡送費托嘅環節，而會長施里蘇亦話會隨時為費托打開大門，歡迎佢日後再返嚟。
尼馬頻貼美斯想返巴塞？
一代球星再次離開西甲，但下季就可能有位球星閃電回流，講緊係效力巴黎聖日耳門嘅尼馬，最近喺ig上載前巴塞隆拿隊友美斯舊年大婚時同佢嘅合照。一直都傳尼馬喺巴黎唔多開心，想返西班牙，又成日上載同舊隊友啲相，唔通真係暗示自己會返魯營？