嚟緊星期日(15日)沙田日賽，並無級際賽上演，甚至一班賽都冇，但當日二班泥地1200米都好精彩，有唔少路有專長的當起分子應戰。
其中此組最受矚目，當然係沈集成馬房的「上簽」，這匹3歲馬服役5戰4冠1亞，亞軍之役是田草1200米，其餘4仗出爭泥地短途未逢敵手，而且每次跑出時間越來越快，擺明具頂班潛質，話唔定日後有機會，代表香港出爭海外的泥地大賽。
不過，沈集成眼前要面對一個問題，就係騎開「上簽」嘅潘頓，日前於澳洲客串出賽犯規，周日須在港服刑停賽，「上簽」焗住要換人，一定惹來各大騎師流晒口水。雷神莫雷拉亦贏過「上簽」，係最好代替人選，但今場雷神亦可騎剛由自己新勝的「加州議長」，而「上簽」日前曾經由楊明綸做替工代為試閘，對呢匹馬已有一定認識。
喺現在這一刻，楊明綸當然希望雷神唔好伸隻手埋嚟，搶走「上簽」，不過楊明綸還是失望收場，根據最新消息，沈集成已決定「上簽」用雷神出賽。