前AV女優蒼井空今年元旦宣佈閃婚，嫁俾其貌不揚嘅DJ NON，近日更傳出懷孕消息，不過「蒼老師」未有暫停工作，近日忙於為新劇《逃亡花》開工。
安排於深夜時段播放嘅《逃亡花》，講述蒼井空飾演嘅女主角咲子遭誣告謀殺親夫，前日蒼井空出席東京舉行嘅新劇記者會，佢着住紅色低胸短裙，露出粗壯手臂又面圓圓，身形確實係脹咗，不過條裙咁貼身都仲未見肚。由於劇中要上演情慾戲份，蒼井空就被問到會唔會影響家庭生活，佢話：「丈夫於工作上給予我好大的自由，絕對不會影響家庭。」
劇集監製森田昇曾於2005年劇集《孃王》與蒼井空合作，森田昇話《逃亡花》落實開拍已選定蒼井空做女主角，又指當年《孃王》令深夜劇時段流行起來，而劇集嘅成功，蒼井空亦居功不少，蒼井空聽到後即刻當場爆喊。