滙控（005）新班子－主席杜嘉祺與行政總裁（CEO）范寧，噚日首度亮相本港非正式股東會，年僅49歲嘅新舵手范寧，先向小股東打溫情牌，話自己1989年加入滙豐，事業起步點正係香港呢個集團搖籃地，當時佢喺尖沙嘴半島分行任分行副經理，做前線業務，家陣升任集團行政總裁，面對一眾長情小股東，真係與有榮焉咁話。
雖然台下一位長者女股東，都好buy新帥系出香港，但佢接住就問，點解家住美孚嗰間滙豐分行，4點半就閂門，服務時間延長到5點半，方便吓啲老人家得唔得？
另一位小股東就唔滿意滙控股價牛皮冇乜升幅，佢仲搞笑話，坐喺枱上嘅滙豐副主席兼行政總裁王冬勝，「恒生（王氏為非執董）、渣打（曾任渣打香港舵手）你都有份坐喺到」，可否加把勁幫小股推高回報？