股王騰訊（700）最近一段時間股價由天堂跌返落凡間，負面消息不斷出現，先有業績表現失望，繼而大股東同高層相繼減持套現，股價最低連400蚊都穿埋，市值落番4萬億樓下。一下子，股王好似變咗垃圾股咁，人人得以沽之。之不過咁，再細心睇，騰訊其實未至於咁不濟，相反，佢仲有大把潛力未釋放。
2017年業績，好多人只係留意同放大騰訊遊戲業務首次倒退嘅影響，繼而斷定騰訊嘅高速增長期已經過去，換句說話就係無高增長，現價就唔值咁高市盈率，大跌就係必然。不過，觀乎整個遊戲市場，大環境其實仲係處於高速增長期，雖然電腦遊戲嘅增長可能慢咗落嚟，不過另一個更大嘅手遊市場都仲係處於高速增長當中，騰訊係手遊嘅霸主，一日只要玩遊戲嘅群體數目持續增長，騰訊基本上肯定受益，所以要好肯定話騰訊遊戲業務增長期已經過去，仲要觀察多兩季。
另外，市場亦似乎低估咗騰訊喺投資壯大自己方面嘅潛力。騰訊喺過去10年時間投資咗超過600間公司，投資資產總額由大約50億暴升到現時超過2,700億。騰訊過去投資咗好多初創公司同未上市嘅企業，國外國內都有，可以預計騰訊係未來會有好多之前投資落嘅公司去上市釋放價值。
上年上市嘅閱文（772）同易鑫（2858）可能只係頭盤，今年嚟緊又會有「美團點評」、「微醫」同「貓眼微影」來港上市。可以預計，呢啲通過將投資嘅公司上市帶嚟嘅公允值提升收益，會成為騰訊未來其中一項增長動力，而且呢個投資業務嘅潛力仲係深不見底。
所以400蚊附近嘅騰訊仲買唔買得過？單單係公司潛力一樣嘢我已經覺得非常抵買。
Melody
Fb.com/whichroad