青年事務委員會升格之後，唔單只由政務司司長親自領軍，仲連個名都改埋做青年發展委員會，有啲舊成員可以過渡，原青委會主席劉鳴煒（MW）就喺新嘅青發會做副主席。
MW對青年事務嘅關注毋庸置疑，睇佢幾緊張年輕人去太多旅行儲唔到錢上車就知啦！關注一件事，點只齋talk咁簡單？MW較早前成立咗個智庫進行研究，協助佢推廣青年工作，智庫運作咗一段日子，係時候畀個名份佢咯。
MW喺fb宣佈，智庫有新名又有新logo，庫如其名叫做「MWYO」，MW話智庫秉持推廣青年工作嘅理念，透過政策研究同調查，探討香港青年議題，自必不忘初衷，聆聽年輕人心聲。睇番智庫網頁簡介，團隊喺2015年初成立，當時成員只有幾名，至今人數遞增一倍，過去研究過嘅青年課題包括性與關係教育、青年政策的歷史發展及青年發展策略的倡議等。