最近高鐵試車出軌，之後又爆出港珠澳人工島疑似「崩堤」，搞到運輸及房屋局局長陳帆周身唔得閒。其實局長真係好忙㗎，除咗呢啲大型基建，本地公營房屋規劃都關佢事，有網民就發現，一幅由政府新聞處發佈嘅陳帆參觀新屋邨相片，睇落竟然同key上去冇乜分別，唔通香港嘅高官真係已經同內地靠PS大神改圖「假視察」成功接軌？
呢張相其實係上個月7號陳帆同副局長蘇偉文去屯門欣田邨視察嗰陣影嘅，佢哋當時聽房屋署人員講解居民入伙安排。有網民話張相無論係顏色、立體感都畀人一種好假嘅感覺，仲激起大家P圖嘅衝動！有人將相中人瞬間轉移咗去外太空建死星，甚至去日本著名泳池監工，P到毫無違和感……
運房局強調無造假
到底張相點解「真到咁假」嘅呢？八方請教過日日玩相機仲多過食飯嘅《蘋果》攝影部一眾大佬，唔少人都認為係閃光燈設定出咗問題，估計呢位攝影高手當時可能係正面對住4個人直打閃光燈，搞到佢哋冇晒立體感、好似key上去嘅咁囉。多謝陳帆局長，又令大家多個萬能key喇！運房局回覆傳媒查詢時強調，相關相片係喺現場實地拍攝，冇任何改動或加工。
李八方
