小紅莓（蔓越莓）細細粒，容易食，據講可減血壓，保護心臟，而且夠鮮夠甜，左丁山都幾鍾意食。小紅莓（Cranberry）最近成為貿易焦點之一，今年年初，歐盟與美國講到貿易關稅，就聲言如果特朗普向歐盟徵收鋼鐵關稅（現已知歐盟可以豁免），歐盟就會向美國小紅莓及威士忌徵收關稅，以示報復。
小小紅莓，何以搞到咁大陣仗？原來歐盟與美國打貿易戰，累積多年經驗，早已由研究人員開發咗一套完整嘅「現代貿易報復系統」，選擇美國貨品徵收高關稅，並非隨機抽樣亂咁嚟，而係根據政治科學專家、經濟師、美國國情研究專家等等精心挑選出嚟嘅，所有在「報復清單內」嘅貨物，皆有數據支持，有政治目標。
歐盟選小紅莓、威士忌，背後有計算。小紅莓盛產於威斯康辛州（佔世界產量五成），歐盟每年輸入1億3千萬美元，相等於美國小紅莓出口之38%，中國買入5千萬美元，相等於15%。威斯康辛州種植小紅莓嘅農場，冇咗歐盟及中國市場就會叫苦連天，2016年大選，威州投票畀特朗普，現任美國眾議院議長瑞安就係威州資深眾議員。另外，美國參議院議長麥康奈，係代表肯塔基州嘅，肯塔基盛產美式威士忌供出口用，肯塔基亦係在總統大選時，支持特朗普嘅。中歐唔買美國小紅莓，威士忌，好容易向愛爾蘭、日本、蘇格蘭入貨代替，但美國生產商冇咗中歐市場就會叫苦連天。
中國從歐洲方面偷師，一定已經針對中美貿易情況，制定一份階段性嘅「貿易報復清單」，目的係以最少金錢代價（如小紅莓），收得最大政治效果，例如瑞安與麥康奈係民選議員，一定要聽選民意見，向特朗普面陳農民聲音，爭取特朗普讓步。因是之故，中國宣佈向美國大豆（Soybean）徵收高關稅，即刻令大豆期貨價格下跌，美國中西部農民即時向CNBC訪問大吐苦水。調番轉頭，美國宣佈向中國貨物徵關稅，中國商人有無意見呢？當然係一啲都冇，中國國企聽黨的話，點會出聲，中國民企受慣管制，邊個敢嘈，福建更有人搞抵制美國貨運動，故此中美貿易戰如果真正展開，美國方面噪音齊鳴，農民、商人、工業家齊聲反對特朗普，中國呢方面好似一致團結對外。民主政制vs.一黨專政就會如此局面出現，最後誰勝誰負，各位自行判斷可也。