政圈最近流傳經民聯梁美芬明年唔再選九龍城區議會，可能因為國家有更重要任務畀佢，無法分身兼顧咁多瓣。
有傳基本法委員會今年中換馬，去年冇再參選港區人大嘅譚惠珠，點會咁易退下火線？據知佢會接替梁愛詩升呢為副主任。至於原有嘅委員席位，本身喺城大法律系教書嘅鼠王芬似乎係大熱，近日流傳佢入會機會高唱入雲，其實佢一直着力推動《基本法》，去年仲搞過大型基本法國際研討會；最近嘅戴耀廷風波，佢就批評對方「政治立場錯誤」，力促戴向中國道歉！
政圈都有人開盤，睇吓有冇人會被out？有政界中人就話喎，嚟緊中共喺香港有好多場法律大戰，委員有冇戰鬥力好重要，而委員之一嘅劉廼強有啲過氣咁噃，據知佢身體狀況亦麻麻，唔知係咪時候退位讓賢？