噚日舉行嘅花旗傑出財經新聞獎頒獎禮，其中一個重點，就係花旗香港行長盧韋柏（Weber）下月將會跳槽去恒隆地產（101）做行政總裁（CEO），而現任CEO陳南祿（Philip）將於同月離任退休，噚日兩雄相遇，Philip竟然向Weber大送高帽！
Philip強調，與Weber認識超過十年，除咗喺商界惺惺相識，兩人都係馬主，成日喺馬場碰面，互相交流養馬心得。
講起自己即將退休，Philip就借啲意送高帽畀Weber。佢話如果香港人退休，可以選擇將錢放喺香港一間美資銀行（即係花旗），多咗嘅儲蓄就可以買股息率達4厘嘅收租股（即係恒隆），「而最重要係恒隆搵到Weber呢個人才，係咪一間好嘅公司先！」
全場人霎時唔識反應，等到Philip問「冇人拍手㗎？」然後現場先至掌聲雷動。
陳南祿最後都認真mode，語重心長咁講話，成世人其實錢唔係最重要，最重要係做人要勤奮、無愧，「呢個先係人生最重要嘅回報」。其實Philip今年先63歲，華華相信佢未來仲會繼續貢獻社會嘅。