內地球壇打交嘅新聞真係特別多，似乎班球員都唔太鍾意用足球解決問題，廣州恒大（FC廣州）兩個預備組仔王軍輝同司徒華龍，喺周一嘅比賽就因為處理球波時有分歧，兩人初則口角，繼而上演「自己人打自己人」（左圖），好似昔日保耶同戴亞兩位紐卡素球員大打出手一樣。
最後王軍輝被罰紅牌離場，而司徒華龍就被罰黃牌。王軍輝事後就知衰喺微博貼文道歉，但球會都冇開恩，周一晚宣佈向兩人判處罰款各20萬元人民幣，兼且即日起停操、停賽兼停薪，更唔准兩人喺合約期內外借同轉會，意即將兩人雪藏，球員生涯隨時凍過水！
卡比路賺完人仔退休
講開中超，曾經執教過中超球會江蘇蘇寧嘅意大利名帥卡比路，雖然上個月就畀球會解約返咗老家意大利，但佢老人家就唔似恒大兩位後生仔咁要為前途擔心，星期一受訪時竟宣佈退休，唔會再執教球隊：「江蘇蘇寧係我最後一份教練工作，我以後會盡情咁做自己鍾意嘅事。」隨住卡比路退休，意大利國家隊教練嘅選擇，又少一個喇。
