潘頓上周六（7日）於澳洲祖家跑大賽，殊不知在一場G3卡賓會錦標出事，因不小心策騎，被判罰由4月9日星期一開始停賽，至4月18日下星期三才可復出。
換言之，他在明晚（11日）谷草夜賽及周日（15日）沙田日馬都不能上陣。
這一次潘頓停賽，其多匹嫡系座騎，紛紛要搵他人代勞。其中，報名周日田戰列正選的泥地王「上簽」（沈集成馬房）已令唔少騎師垂涎三尺，結果「上簽」已落實換雷神莫雷拉執韁，如果屆時由雷神勝出，潘頓他日想搶番唔係咁易。
另一匹潘頓失去的馬，是騎開的應屆香港經典盃亞軍兼打吡季軍「時時精綵」，練馬師告東尼則召來另一澳系騎師柏寶執韁，出爭周日二班田草2200米長途賽。
呢匹馬質素極高，今場對手遠弱過上次的「平海福星」，本來穩勝，如今讓予柏寶，唔肉赤就假。
今季告仔與柏寶合作18匹次，季初曾攜手贏出「帝豪寶寶」，今次難得獲關照接手一匹牌面惡馬，屆時必然施展渾身解數，不會錯過贏馬良機。